އެމްސީޖީއެޗް އުވާލައި ހޮސްޕިޓަލްތައް އެއް ގްރޫޕަކަށް
ސަރުކާރުގެ ހުރިހާ ޓާޝަރީ ހޮސްޕިޓަލްތައް މޯލްޑިވްސް ޓާޝަރީ ހޮސްޕިޓަލްސް ގްރޫޕްގެ ދަށަށް ނޮވެމްބަރުން ފެށިގެން ތިން ހަތަރު މަހުގެ ތެރޭގައި ގެނެވޭނެ ކަމަށް ރައީސް ވިދާޅުވެއްޖެއެވެ.
މާލެ ސިޓީ ގްރޫޕް އޮފް ހޮސްޕިޓަލްސް (އެމްސީޖީއެޗް) އުވާލައި، އޭގެ ބަދަލުގައި މޯލްޑިވްސް ޓާޝަރީ ހޮސްޕިޓަލްސް ގްރޫޕް ގާއިމުކުރާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާން ކުރައްވައިފިއެވެ.
ރައީސް އޮފީހުން 28 އޮކްޓޫބަރުގައި ބުނީ، ރައީސް މި ކަން އިއުލާން ކުރެއްވީ ޕޮޑްކާސްޓް އިންޓަވިއުއެއްގައި ވާހަކަފުޅު ދައްކަވަމުން ކަމަށެވެ. މި ބަދަލު ގެނެސްދެނީ ސިއްހީ ނިޒާމު ވަރުގަދަކޮށް، ހިދުމަތުގެ ފެންވަރު ރަނގަޅުކޮށް، އެއް މަސައްކަތް ދެ ތަނަކުން ކުރުން ހުއްޓުވައިގެން ހަރަދު ކުޑަކުރުމުގެ މަގްސަދުގައި ކަމަށް ރައީސް އޮފީހުން ބުނެއެވެ.
ރައީސް އޮފީހުން ބުނީ ސަރުކާރުގެ ހުރިހާ ޓާޝަރީ ހޮސްޕިޓަލްތަކާއި، ޓާޝަރީ ފެންވަރަށް ތަރައްގީ ކުރަމުންދާ ހޮސްޕިޓަލްތައް ވެސް، އެއް އިދާރީ އޮނިގަނޑެއްގެ ދަށަށް ގެނެވޭނެ ކަމަށެވެ.
ހޮސްޕިޓަލްތައް އާ ނިޒާމަށް ބަދަލުކުރުމުގެ މަސައްކަތް ނޮވެމްބަރުން ފެށިގެން ތިން ހަތަރު މަހުގެ ތެރޭގައި ނިންމާނެ ކަމަށް ރައީސް ވިދާޅުވިއެވެ. މި ބަދަލާ އެކު އިތުރު މުވައްޒަފުން ބޭނުން ނުވާނެ ކަމަށްވެސް ރައީސް ވިދާޅުވިއެވެ.
ބަލިމީހުންނަށް ލިބޭ ފައިދާ
ރައީސް އޮފީހުން ބުނީ ހޮސްޕިޓަލްތައް އެއްކޮށްލުމުން ވަސީލަތްތައް ހިއްސާކުރެވި، ސްޕެޝަލިސްޓް ޑޮކްޓަރުންގެ ހިދުމަތް އެކި ހޮސްޕިޓަލްތަކުގައި ބޭނުންކުރެވޭނެ ކަމަށާއި، އެއީ ރައްޔިތުންނަށް ލިބޭ ސިއްހީ ހިދުމަތުގެ ފެންވަރު ރަނގަޅުވާނެ ކަމެއް ކަމަށެވެ. ނަމަވެސް ބަލިމީހުން އެޕޮއިންޓްމަންޓް ހޯދާ ގޮތަށް ނުވަތަ ފަރުވާ ހޯދާ ގޮތަށް ބަދަލެއް އަންނާނެ ކަމަށް އަދި އިއުލާނެއް ނުކުރެއެވެ.
ސަރުކާރުގެ ހަރަދުގައި ކިޔަވައިދީފައިވާ ޑޮކްޓަރުންގެ ހިދުމަތް ފުރިހަމައަށް ހޯދުމުގެ އިންތިޒާމުތައް ހަމަޖައްސާނެ ކަމަށާއި، ހާއްސަ ފަރުވާ ދިނުމަށް ބޭރުގެ ސްޕެޝަލިސްޓުން ރާއްޖޭގައި ބަހައްޓާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ ސިއްހީ ދާއިރާ ތަރައްގީ ކުރުމަކީ ސަރުކާރުގެ މުހިންމު ތަރުޖީހެއް ކަމަށާއި، ރާއްޖޭގެ އެކި ސަރަހައްދުތަކުގައި ޓާޝަރީ ހޮސްޕިޓަލް ގާއިމުކުރުމުގެ މަސައްކަތް ހިނގަމުންދާ ކަމަށެވެ. އަތޮޅު ހޮސްޕިޓަލްތަކާއި ރަށްރަށުގެ ސިއްހީ މަރުކަޒުތަކުގެ ފެންވަރު ރަނގަޅުކޮށް، ރައްޔިތުންނަށް ގާތުން ފަރުވާ ލިބި، ފަރުވާއަށް ބޭރަށް ދާން ޖެހުން ކުޑަކުރުމަށް މަސައްކަތް ކުރަމުންދާ ކަމަށްވެސް ރައީސް ވިދާޅުވިއެވެ.
މިހާރު އެމްސީޖީއެޗްގެ ދަށުގައި ހުރި ހޮސްޕިޓަލްތައް
އެމްސީޖީއެޗްގެ ރަސްމީ ވެބްސައިޓުގައިވާ ގޮތުން، މިހާރު އެ ގްރޫޕުން ހިންގަނީ އިންދިރާ ގާންދީ މެމޯރިއަލް ހޮސްޕިޓަލް، ދަރުމަވަންތަ ހޮސްޕިޓަލް، ހުޅުމާލެ ހޮސްޕިޓަލް އަދި ވިލިމާލެ ހޮސްޕިޓަލެވެ. އާ ގްރޫޕުގެ ދަށަށް ގެނެވޭ ހުރިހާ ހޮސްޕިޓަލްތަކުގެ ލިސްޓެއް ސަރުކާރުން އަދި ހާމައެއް ނުކުރެއެވެ.
