ޗައިނާގެ ކުންފުންޏަކާއެކު 15 މެގަވޮޓުގެ ސޯލާއާއި ބެޓެރީ ސްޓޯރޭޖަށް ސޮއިކޮށްފި

ޗައިނާގެ ކުންފުންޏަކާއެކު 15 މެގަވޮޓުގެ ސޯލާ ހަކަތައާއި ބެޓެރީ ސްޓޯރޭޖް ގާއިމުކުރުމަށް ސަރުކާރުން ސޮއިކޮށްފިކަމަށް ކްލައިމެޓް ޗޭންޖް، އެންވަޔަރަމަންޓް އެންޑް އެނާޖީ މިނިސްޓްރީން ހޯމަ ދުވަހު ބުންޏެވެ.

މިނިސްޓްރީން ބުނި ގޮތުގައި، ޒެޖިއަންގް ޗިންގްޓިއަން ސޯލާ އެނާޖީ ޓެކްނޮލޮޖީ ކުންފުނިން 15 މެގަވޮޓުގެ ސޯލާ ފޮޓޮވޯލްޓެއިކް ސިސްޓަމަކާއި 15 މެގަވޮޓް އަވަރުގެ ބެޓެރީ އެނާޖީ ސްޓޯރޭޖް ސިސްޓަމެއް ގާއިމުކުރާނެއެވެ.

މިނިސްޓްރީގެ ފަރާތުން ސޮއިކުރެއްވީ ޙުސައިން އަޤީލް ނަޞީރެވެ. ކުންފުނީގެ ފަރާތުން ސޮއިކުރީ އެ ކުންފުނީގެ ނައިބު ރައީސް ޑޮންގްޓިން ހޭ އެވެ.

މި ފިޔަވަޅަކީ ޤައުމީ ކަރަންޓު ނިޒާމު ވަރުގަދަކޮށް، އިޔާދަކުރަނިވި ހަކަތަ ރައްކާކުރުމުގެ ޤާބިލުކަން އިތުރުކުރުމަށް އެޅުނު މުހިންމު ފިޔަވަޅެއް ކަމަށް މިނިސްޓްރީން ސިފަކޮށްފައިވެއެވެ. ބެޓެރީ ސްޓޯރޭޖުގެ ސަބަބުން ދުވާލު ސޯލާއިން އުފައްދާ ކަރަންޓު ފަހުން ބޭނުންކުރެވި، ޑީސަލް ޖަނަރޭޓަރުތަކަށް ބަރޯސާވުން މަދުވެއެވެ.

ސިސްޓަމްތައް ގާއިމުކުރާނީ ކޮންތާކު، މަޝްރޫއުގެ ހަރަދަކީ ކިހާވަރެއް، ނުވަތަ މަސައްކަތް ނިންމާނީ ކޮން އިރަކުކަން މިނިސްޓްރީން ހާމައެއް ނުކުރެއެވެ.

ސަރުކާރުގެ ދައުރު ނިމޭއިރު ޤައުމުގައި އުފައްދާ ކަރަންޓުގެ 33 ޕަސެންޓް އިޔާދަކުރަނިވި ހަކަތައިން އުފެއްދުމަކީ ސަރުކާރުގެ އަމާޒެކެވެ. ރައީސް ޑރ. މުޙައްމަދު މުޢިއްޒު މި އަމާޒު އިޢުލާނުކުރެއްވީ 2023 ވަނަ އަހަރުގެ ޑިސެންބަރުގައި ބޭއްވުނު ކޮޕް28 ސަމިޓުގައެވެ. އޭރު ރައީސް ވިދާޅުވީ، މިކަމަށް ގާތްގަނޑަކަށް 600 މިލިއަން ޑޮލަރު ބޭނުންވާނެ ކަމަށާއި ބައިނަލްއަޤްވާމީ އެހީތެރިކަން ބޭނުންވާނެ ކަމަށެވެ.

އިޔާދަކުރަނިވި ހަކަތައިގެ އިންސްޓޯލްޑް ކެޕޭސިޓީ 53 މެގަވޮޓުން 126 މެގަވޮޓަށް ސަރުކާރުން އިތުރުކޮށްފައިވާ ކަމަށް އެންވަޔަރަމަންޓް މިނިސްޓަރު ޢަލީ ޝަރީފް މިދިޔަ މަހު ވިދާޅުވިއެވެ. މިނިސްޓަރު ވިދާޅުވި ގޮތުގައި، މިކަމުން އަހަރަކު ގާތްގަނޑަކަށް 3.1 މިލިއަން ލީޓަރުގެ ޑީސަލް ބޭނުންކުރުން މަދުވާނެއެވެ.